Smartmi Air Purifier review

The story

ម៉ាស៊ីនបន្សុទ្ធខ្យល់ Smartmi ត្រូវបានបង្ហាញពីសមត្ថភាពសម្អាតខ្យល់បានយ៉ាងរហ័ស តាមរយៈតម្រងចម្រោះបីជាន់ និងសេនស័រឡាស៊ែរចាប់ធូលីល្អិត។ ឧបករណ៍នេះដំណើរការដោយស្ងាត់ល្អ និងមានស្លាបបក់ដែលអាចកែតម្រូវបានរហូតដល់ ៩០ ដឺក្រេ សម្រាប់សម្រួលដល់ការប្រើប្រាស់ក្នុងទីតាំងចង្អៀត។

ម៉ាស៊ីនបន្សុទ្ធខ្យល់ខ្នាតធំរបស់ Smartmi នេះ បំពាក់នូវ Laser Sensor នៅផ្នែកខាងក្រោយ ដែលមានសមត្ថភាពចាប់ដឹងពីមេរោគ និងធូលីល្អិតៗនៅក្នុងបន្ទប់បានយ៉ាងជាក់លាក់។ ជាមួយគ្នានេះ តម្រងចម្រោះខ្នាតធំចំនួន ៣ ជាន់ ជួយស្រូបយកធូលី មេរោគ ព្រមទាំងកម្ចាត់ក្លិនផ្សេងៗដូចជា ក្លិនអាហារ ក្លិនធូប ឬផ្សែងបារីបានយ៉ាងលឿន និងបញ្ចេញខ្យល់បរិសុទ្ធត្រឡប់មកវិញ។

នៅពេលប្រព័ន្ធស្កែនដឹងថាគុណភាពខ្យល់មានកម្រិតប៉ះពាល់ដល់សុខភាព ភ្លើងសញ្ញានឹងបង្ហាញពណ៌ក្រហម ហើយកង្ហារនឹងបង្កើនល្បឿនបង្វិលដើម្បីបន្សុទ្ធខ្យល់ភ្លាមៗ។ លុះត្រាតែខ្យល់ក្នុងបន្ទប់ប្រែមកជាស្អាតល្អវិញ ទើបសញ្ញាប្តូរទៅជាពណ៌បៃតង ហើយកង្ហារនឹងបន្ថយល្បឿនមកធម្មតាវិញ ដោយដំណើរការយ៉ាងស្ងាត់បំផុត។

ក្រៅពីនេះ ម៉ាស៊ីនមានចំណុចពិសេសដោយស្លាបខាងមុខអាចសារ៉េបានរហូតដល់ ៩០ ដឺក្រេ ដែលជួយឱ្យការបាញ់ខ្យល់ចេញចូលកាន់តែស្រួល ទោះបីជាដាក់នៅកន្លែងចង្អៀតដូចជាក្រោមទូក៏ដោយ។ ឧបករណ៍នេះក៏មានអេក្រង់ Touch Screen សម្រាប់មើលតួលេខគុណភាពខ្យល់ និងបញ្ជាមុខងារផ្សេងៗ រួមទាំងអាចបញ្ជាតាមទូរសព្ទដៃផងដែរ ខណៈការរចនារូបរាងមានពណ៌ប្រផេះលាយខ្មៅបែបទំនើប និងមានដាក់លក់នៅ Skytech Cambodia។