KFI Ai Smart Glasses Review

The story

វ៉ែនតាឆ្លាតវៃ AI Smart Glass ពីម៉ាក KFI ត្រូវបានដាក់បង្ហាញក្នុងតម្លៃជាង ៧០ ដុល្លារ ដោយបំពាក់នូវសមត្ថភាពថតវីដេអូកម្រិត 2K និងមុខងារ AI ជំនួយដល់ការបកប្រែភាសា។ ឧបករណ៍នេះក៏មានភ្ជាប់មកជាមួយសមត្ថភាពការពារទឹក និងថាមពលថ្មដែលអាចប្រើប្រាស់បានចន្លោះពី ៤ ទៅ ៧ ម៉ោងផងដែរ។

វ៉ែនតាឆ្លាតវៃនេះមានសេនស័រកាមេរ៉ាដែលអាចថតវីដេអូបានក្នុងកម្រិត 2K 30fps ផ្ដល់នូវរូបភាពច្បាស់ និងបង្ហាញពណ៌បានដិតល្អ ទោះបីជាការពង្រីកមើលព័ត៌មានលម្អិតក៏មិនបែកគ្រាប់រូបភាពដែរ។ នៅលើតួវ៉ែនតាមានប៊ូតុងសម្រាប់បញ្ជាថត និងបញ្ឈប់ ព្រមទាំងមានភ្លើងសញ្ញាបង្ហាញពេលកំពុងដំណើរការ។ ចំពោះទិន្នន័យវីដេអូ និងរូបភាព អាចទាញចូលទូរសព្ទដៃបានយ៉ាងរហ័សតាមរយៈកម្មវិធីដែលគាំទ្រទាំងប្រព័ន្ធ Android និង iOS ដើម្បីយកទៅបង្ហោះលើបណ្ដាញសង្គម។

ក្រៅពីការថតរូបភាព វ៉ែនតានេះមានបំពាក់ Speaker ចំនួនពីរតម្រង់មករកត្រចៀក ដែលអាចភ្ជាប់ Bluetooth ស្ដាប់ចម្រៀង និងនិយាយទូរសព្ទបាន ព្រមទាំងមានមុខងារ Touch Control នៅដងខាងស្ដាំសម្រាប់បញ្ជាចម្រៀង។ ចំណុចលេចធ្លោមួយទៀតគឺមុខងារ AI Translation ដែលអាចជួយបកប្រែភាសាដោយស្វ័យប្រវត្តិចូលមកត្រចៀកនៅពេលសន្ទនាជាមួយជនបរទេស។

ចំពោះផ្នែករឹង វ៉ែនតានេះមានមុខងារការពារទឹកដែលមិនបារម្ភពេលត្រូវទឹកភ្លៀង ហើយថ្មអាចកាន់បានពី ៤ ទៅ ៧ ម៉ោងបន្ទាប់ពីសាកពេញ។ លើសពីនេះ អ្នកប្រើប្រាស់អាចផ្លាស់ប្ដូរកញ្ចក់ទៅជាប្រភេទកញ្ចក់ការពារពន្លឺថ្ងៃ ឬកញ្ចក់ដឺក្រេបានតាមតម្រូវការ។ វ៉ែនតាឆ្លាតវៃ AI Smart Glass នេះ មានដាក់លក់នៅលើទំព័រ KFI Cambodia។